روحه دايمًا حاضره
الأربعاء 17 يناير 2024
كتب
مراد ناجح
خطوتــين بهدوء
والتالته لو حبّيـــت..
أدخل
وماتعملش صوت
خلّى عنيك تطوف المكان
وكإنّك واحد من أهل البيت
جاى من سكّة سفر
وبيقرا الذّكريات
والناس ف الصور ..
اللى ع الكمودينو ده
طربوش قديم بتاع جدّى
لو طوّلت النظر ليه شويّه
أجرى قوام اقفل الشبابيك
وأشد الستاير
إكمنّها روحه دايمًا حاضره
وبتخاف م الهوى يقلب حال البنات
وتمشى على كيفها
وده راديو ترانزستور
من وقت ما كان الونس بالناس
وألف إيد تتمد وتسندك
لو مِلت
ودى صورة أمّى ف شبابها
قبل اللى مايتسمّى يزورها
وتقول: عجّزت
(وتقول للزمان ارجع يازمان ..)
خطوتــين بهدوء
والتالته لو حبّيـــت
سامع دق خفيف ع الباب
أكيد فى حد جاى
نفسه ف كبّاية شاي
وكإنّه واحد من أهل البيت