.. لونها لونك

ياما نفسى أغمض عينى وافتحها

على بنت سمرا لونها من لونك

أطوى بلاد العشق مطرحها

مرجعش تانى يا حلوة من دونك

ياما نفسى أغمض عينى وافتحها

على روح بتحلم فى البعاد بيا

تكتبنى حضن بشوق فى أغنية

وتردد اسمى فى الصدى حرفين

حـب ويامين يتهجى شوق العين

الليل ينام

يصحى الحنين صوتك

كما ألف آه والنظرة ألف سبيل

عطشان وقلبى بخيل معشقش غير طيفك

حالف يكونلك وانتى حالفة بمين

ياما نفسى أغمض عينى مفتحهاش

غير وانتى كفك فى الفرح كفى

تعشق قلوبنا الطيبين م الناس

ويساوى صفك فى الصلا صفى

ياما نفسى أغمض عينى مفتحهاش 

علشان مافيش شبهك

علشان مافيش شبهي

علشان مافيش طيبين 

وأواننا لسه مجاش