فى عشق عبدالرحيم منصور

بيقولوا الميت إحساسه أكتر م الحيّ

وأنا دايمًا روحك حواليّا وف كل مكان

إيدك بتطبطب على روحى وكتفى البردان

وعيونك تلمع ف السماوات كما ضى ف ضي

بيقولوا الميت إحساسه أكتر م الحيّ

يا عطاشا الحلم تساهيل يا حلاوة البكرة أهو جيّ

يا حياة بتعارك أسرارها وأصل المكنون

بتنادى الليل وتلاغى عيونه الغربة تهون

مولد أفراح زغاريد وسبوع على دقة هون

وكلامك يرقص م الفرحة على عود لبليغ

يرمى النظرات لعيون وردة وحبيب لحبيب

دندن يا منيب.

وأنا بسمع صوتك بينادى ف ودانى يا مىّ

واستنى تعيدها تقول تانى.. ولا زيك زيّ

مين اللى يقول إنك ميت

هما الأموات وبروحك حيّ