الأحد 3 يوليو 2022
رئيس مجلس الإدارة
هبة صادق
رئيس التحرير
وليد طوغان
ســيطر علــى أفكـــارك

ســيطر علــى أفكـــارك

تمارين التأمل، اليقظة وزيادة التركيز 



التمارين دى مش خرافة ولا موضة جديدة بالعكس هى شكل قديم من أشكال التأمل اللى بيزود التركيز والوعى وبيساعدك تعيش اللحظة.

ممارستك لأى تمرين من النوع ده بيشجعك على التركيز على جسمك وأفكارك وتركز فى الحاجات اللى حواليك وتحس بالنعم اللى عندك فتستمتع وتظبط موودك.

1- تعويذة التأمل Mantra:

ده تمرين اسمه غريب لكنه سهل وبسيط... أنت بتجمع كل انتباهك على هدف واحد، زى كلمة معينة بتكررها فى سرك (مثلاً: الحمد لله، أو الحب، أو حتى أى كلمة من اختيارك).

2- التركيز على شىء مادى 

ممكن بدل ما تختار كلمة تختار إنك تركز على لهب شمعة أو ورقة شجرة.

فى أى نوع من النوعين، كل ما تسرح أو عقلك يشت ويرجع للأحداث اليومية أو أفكارك فى اللى هتعمله أما تخلص أو مين قالك إيه وووراك إيه بعد شوية ومشاوير بكرة.. لازم تسيطر وترجع عقلك للتركيز فى الشىء اللى أنت اخترته- دى مهارة دماغية، بنميها جوانا من خلال الاستمرار عليها. 

طبيعى جدًا أنك فى أول أسبوعين ما تكونش تكون قادر على السيطرة على عقلك وهيفضل عقلك يفلت ويشت وتحاول ترجعه. وده أمر طبيعى.

أنت هنا بتمرن عقلك أنه يسمع كلامك ويفكر فى اللى أنت عايزه مش هو اللى يسيطر عيك ويسحبك وراه فى أفكار سلبية وهموم وتفكير مفرط هم بيحرقوا بنزين وبيخلصوا طاقتك وبيضيعوا عمرك.

2- سحر وقوة التخيل

ربنا منحنا قدرة هائلة ميزنا بيها عن باقى الكائنات كلها وإحنا فى الحقيقة مش مقدرين قيمتها.. القدرة على التخيل اللى واحدة من أدوارها الكتير هى أنها تخليك تصفى دماغك من أى توترات وتساعدك على التركيز.. هنا إنت بتستخدم قوة عقلك لتغيير تركيزك لوقت ما أو حدث ما فمجرد تغيير أفكارنا والتركيز على وقت كنا فيه مرتاحين أو مبسوطين هو وسيلة فعالة جدًا لتخفيف التوتر.

فمثلا: تخيل نفسك مستلقيًا على شاطئ رملى مع نسيم ناعم يحرك الهواء الدافئ بلطف. 

استخدم حواسك لشم ريحة المياه المالحة والشعور بالشمس وأنت ممدد هناك، عيش اللحظة وكأنك نقلت نفسك وقاعد هناك فعلا. 

اسرح فى كل تفاصيل المشهد واستشعره بحواسك تماما وجرب وشوف مزاجك اتغير ازاي.

ممكن طبعا أنك تتخيل نفسك بتعمل عمرة وواقف قدام الكعبة وبتدعى وشوف احساسك هيبقى هيعلى ازاي!

دى تمارين علمية ومدروسة وصحيحة مية فى المية بتساعدك تقلل التوتر، وتتحكم فى أفكارك وتصفى ذهنك وتقوى تركيزك وكمان تغير موودك.. شوف سبحان الله ربنا ادانا مصادر كتيرة جوانا وإحنا بنتريق عليها وبنقلل منها أو هاملينها ومش بنستخدمها إزاي؟