احكوا لى.. مع: رولا خرسا
معظم المشاكل لها حلول.. نحن نفكر معًا لإيجادها.. ممكن نخطئ وممكن نصيب المهم أننا نحاول.. والأهم ألا نيأس مهما تكاثرت همومنا.
ونذكر بعضنا البعض دومًا بالمثل الشعبى الجميل: تبات نار تصبح رماد .
جوزى عاوز يتجوز!
مخى مش قادر يستوعب هاحكى موضوعى بس لازم تفكرى قبل ما تردى عليّا.
تخيلى.. لو جوزك اللى انتى بتحبيه وكمان متجوزين عن قصة حب جيه فى يوم وقالك أنا حبيت واحدة جدا وعايز أتجوزها هتعملى إيه؟! هاتردى تقولى له إيه..؟
ده إللى حصل معايا.
رغم إنه مش مقصر نهائى فى بيته ولا معايا ولا ابنه وبيعاملنى كويس جدًا وكل حاجة عليه بيعملها على أكمل وجه.. أتصرف إزاى؟ هل هو من حقه يحب تانى بجد؟! هل بعد ما حبيته واديته عمرى من حقه يحب واحدة تانية؟ كل ما أفكر أحس إنه خلاص أنا بقيت مجرد أم ابنه وقلبه مع غيرى أتجنن من التفكير آه هو مقالش إننا نتطلق لكن مش قادرة أبص فى وجهه، حاسة إنى اتخانت، هو حقه شرعًا بس أنا مش مقصرة معاه، إزاى قلبه يتحرك لغيرى وإحنا كنا بنحب بعض؟ ولا كل السنين دى أنا شايفة حد تانى.. تفتكرى أعمل إيه؟
الحل المقترح: جوزك محترم.. واصبرى!
هو سؤال صعب جدااا.. الحقيقة مش عارفة أرد عليك إزاى.. هل حقه يحب واحدة تانية وهو متجوزك؟
هحاول كده بالراحة أفكر معاكى.. حقه؟ ما هو لو شرع حقولك أيوة.. لو على عاداتنا واللى اتعودنا عليه فلأ.
خلينا نفصص الموضوع.. هو احتمال من اتنين: إما إنه يكون فعلاً بيحبها وإما أنها تكون نزوة وحتعدى.. لو نزوة شوية وحيرجع ويتأسف وساعتها لازم تشوفى ايه اللى حصل ووصل علاقتكم اللى إنه يحب واحدة تانية.. ساعات احنا بنبقى فى مشكلة بس مش بنواجهها متخيلين إنها هتتحل لوحدها.. بس للأسف فجأة بتنفجر فى وشنا بأى شكل كان.. لو طلعت نزوة يبقى لازم تتكلموا وتحاولوا تفهموا ليه وإمتى بقيتم بعيد عن بعض وأسباب البعد اللى دخل عنصر تالت للعلاقة.
أما لو طلع حب بجد فهنا الحقيقة الموضوع هيبقى معقد ومش عارفة أقولها لك إزاى.. لازم تتوقعى إنك لو سبتيه تكونى جاهزة لشيلة الأولاد غالبًا ومعظم الوقت لوحدك.. ولو قررت تفضلى على ذمته لازم تقبلى فكرة إن قلبه مش معاكى.
بس كلمة حق: جوزك رجل محترم.. معظم الرجال فى العالم العربى للأسف يتزوجون فى السر وبيعيشوا حياة مزدوجة فيها كدب كتير.. جوزك رفض دا وفضل يكون صريح وأمين معاكى..
من رأيى انتظرى شوية.. شوفى علاقتهم هتتطور لإيه واحسبيها.. أنا عارفة إن الشرع بيحلل له أربعة بس مش أى ست تقدر تستحمل ضرة.. اصبرى شوية وهتلاقى نفسك واخدة القرار الصح..وربنا ينور قلبك. والقرار قرارك.