احكوا لى.. مع:رولا خرسا

معظم المشاكل لها حلول.. نحن نفكر معًا لإيجادها.. ممكن نخطئ وممكن نصيب المهم أننا نحاول.. والأهم ألا نيأس مهما تكاثرت همومنا. ونذكر بعضنا البعض دومًا بالمثل الشعبى الجميل: تبات نار تصبح رماد .

 

جوزى ولاَّ مستقبلى؟!

 

أنا متجوزة من سنتين لشخص المفروض مليان مميزات قدام الناس لكن الحقيقة عندى مشاكل كتير معاه فى حياتى لكن اللى قلبها كانت آخر مشكلة جاتلى منحة دراسة برة مصر لمدة ٨ شهور (مش ناوية خالص أعيش أو اكمل برة مصر) وجوزى رافض تماما أنى أسافر لوحدى حاولت معاه كتير بالكلام والمناقشة والخناق ومفيش فايدة والفرصة يمكن متجيش تانى أبداً وآخر مرة اتكلمنا قالى بكل هدوء لو عاوزة تسافرى سافرى بس ورقتك هتجيلك قبل ما الطيارة تتحرك. 

جوزى للأسف مبيخلفش ونسبة العلاج تكاد تكون منعدمة وحاولنا كتير على مدار السنتين ومفيش فايدة أنا مش فارق معايا الخلفة أوى لكن بفكر طب أنا بعمل إيه فى حياتى لا عارفة أكون أم ولا عارفة أكبر فى كارير والعلاقة بنا تكاد تكون منعدمة كل شهر وأحيانا كل شهرين يعنى كمان مفيش حياة زوجية مستقرة، طبعاً بعد كلامنا آخر مرة سبت البيت وروحت لأهلى وهما منقسمين على رأيين اللى بيقولى بلاش تخربى بيتك وعيشى واللى بيقولى سافرى وسيبك منه يمكن تقابلى عريس جديد وتلحقى تخلفى عيل قبل ما تكبرى واللى قاتلنى من جوة إنه واقف قصادى وحسيته بايع أوى وإحنا مش زوجين مترابطين بقى وكل يوم قاعدين مع بعض وبنتكلم إحنا بنتقابل صدفة هو عنده هنا حياته اللى مستحيل يسيبها 8 شهور ومستشفى وعيادة وساعات بيبات فى الشغل ويرجع أكون أنا نزلت شغلى ولما أرجع بيكون صحى ونزل تانى مش بناكل فى البيت 90 % من الوقت يعنى سفرى مش هيعمل كوارث أنا قدامى أسبوعين لازم أخد فيهم قرار ودماغى هتتفرتك هو كمان فى مميزات كتير كريم وبيصرف عالبيت وعليا وعمره ما بص لفلوسى وراجل محترم لا بيشتم ولا بيضرب وكل فترة بياخد إجازة يسفرنى ويفسحنى وشكله حلو وشيك ومن عيلة وشغل وتعليم وثقافة هل المميزات دى قصاد العيوب دى تكسب ولا لاء؟

أنا محتارة أوى إحنا مش قصة حب لكن فى عشرة واحترام وخايفة أضيع الفرصة نطلق بردو فى الآخر لأى سبب تانى وأكون خسرت كل حاجة.  

الحـل المقترح: التهديد مرفوض

 

عارفة لو كنتى قلتى بتحبيه.كنت على طول حقولك ما تزعليهوش وربك يعوضك بحاجة تانية أون لاين مثلا..

لو كنت جبتى أى كلام عن مشاعر كنت هفكر معاكى برضو نحسبها ، لكن أنتى بتحكى عن مميزات وعيوب..وده كويس ومش عيب.بس خلينا الأول نحاول نقنعه قبل ما نفند حياتك.. بداية لازم تفهمى هو ليه رافض السفر؟ اسأليه ولحّى عليه إيه سبب رفضه الحقيقى.. ما يمكن فيه حاجة خايف منها ومش بيقولها.. وحاولى تطمنيه إنك راجعة وأنه مش حتعيشى هناك وإنه ممكن يجى يزورك وتتفسحوا سوا..

ما نفعش ؟ طب إيه الحل؟

قبل ما تقررى أى حاجة لازم تقفى قدام كلامه  إنك لو هتسافرى هيطلقك..

التهديد مرفوض فى أى علاقة خاصة الزواج… لازم يبقى فيه إقناع وتفاهم  واحب أقولك إنه غالبا بيهدد بس  وغالبا مش هيطلقك.. بس برضو لازم نحط الاحتمال دا..

هنا بقى نفند حياتك..

بتتكلمى عن مميزاته والشكل الاجتماعى ومستواه دول مش كل حاجة  دى مش حياة..انتوا اتنين أصحاب عايشين فى اللطافة بتتفسحوا وتخرجوا وفى واحد كريم بيصرف وده حقك على فكره..مش جميلة بيعملها .

طب دلوقتى تمام إنتى لسة صغيرة ولما تكبرى شوية وخلقك يضيق وتحسى أن العمر بيجرى والزوج الكريم إلى مش بيعمل حاجة زياده غير إللى المفروض يعمله والعادى يبتدى هو كمان يزهق.. حتعملى إيه؟ يعنى بادية حياتك الزوجية وكل واحد عنده حياته.. أمال كمان كم سنة حتعملى إيه؟

طب سيبى ده كله لو إنتى بحالتك دى قررتى تقعدى  وماتسافريش حتقدرى تكملى عادى وتتحملى من غير ما تحسسى  زوجك الذنب واللوم حتى فى النظرات وما تسمعيهوش كل شوية كلام انه ضيع عليكى فرصة؟.

طيب ما كده ديونه هتتقل!!! الخلفة والكارير  أو المستقبل والسفر والعلاقة إلى بينكم أو عدم العلاقة..

طب بلاش إنتى تفتكرى حتى لو  إنتى تناسيتى هو نفسه مش عارف أن تقصيره من ناحيتك بيكتر وان هيجى يوم هيبأه عاوز يتحرر من احساسه بالذنب أو يحررك من حالة الحرمان اللى انتى فيها؟

بلاش كل دا حتى موضوع الاطفال مش حاتكلم فيه وحنقول إنهم  رزق من عند ربنا فيه ناس سليمة وما بتخلفش بس حياتك الزوجية نفسها فين؟ لا فيه علاقة ولا حياة وسنك صغير.. طب ومتطلباتك كانثى  دول مش فى الحسبان؟عادى؟ مش فارقة بردة؟

عشان كدة الحل انك تقعدى معاه  وتفهميه إنه بيلوى ذراعك وإنك بتحبيه وبتقدريه وإنك مش عاوزه تخسريه وإنه مفيش أولاد علشان تكونى بتظلميهم بسفرك ولا إنتوا فى وش بعض 24 ساعة فى اليوم فهو حيفتقدك ، فليه التحكم ؟وقولى له كدة  أنت بقى إلى عاوز تبيع وارمى الكره فى ملعبه ولو قالك معنديش غير كده يكون هو إللى اختار.

آخر حاجة  صلى استخارة عشان حسابات ربنا تختلف عن حسابتنا البشرية وادعى أن ربنا ينور بصيرتك وشوفى ربنا هايوفقك لأيه. وربنا يرزقك القرار الصح.

والقرار قرارك.