الإثنين 23 مايو 2022
رئيس مجلس الإدارة
هبة صادق
رئيس التحرير
وليد طوغان

احكو لى.. مع: رولا خرسا

معظم المشاكل لها حلول.. نحن نفكر معًا لإيجادها.. ممكن نخطئ وممكن نصيب المهم أننا نحاول.. والأهم ألا نيأس مهما تكاثرت همومنا.



ونذكر بعضنا البعض دومًا بالمثل الشعبى الجميل: تبات نار تصبح رماد 

 

غلطة عمرى

اسمى سعيد من يأسى من حل مشكلتى بدأت أعتقد أن المشكلة فيا أنا.

هاحكى مشكلتى يمكن تلاقى لى حل وبعد سنين كتير من اللى عملته لولادى ومراتى أقدر أقف تانى وأبنى نفسى لأنى اتهديت واتهزت ثقتى فى نفسى بعد كل اللى عملته وراح هباء.

اتقدمت لبنت الناس واتجوزتها وأخدتها وسافرت أمريكا عشنا سنين وخلفت منها بنتين وولدين ولادى أمريكا طبعتهم بطباعها ومفيش منهم من مصر  غير جنسية بالاسم بس.

كل واحد منهم فى طريقه بعد ما كبروا وخلصوا تعليمهم ولكن بفشل ذريع إلا من رحم ربى مفيش فيهم واحد مش معتمد عليا وأما أتكلم مع مراتى وأقولها وعى ولادك تقولى دورك تصرف عليهم.

أهملتنى وبقى همها لبسها وخروجها وحياتها مشاكلنا الأساسية فى شكها فيا طول الوقت رغم أنى مخلص وأصلا مريض بالسكر واللى زيى لا يقدر يبص كده ولا كده.

أنا دكتور ومركزى كبير ومن عائلة محترمة لا دينى ولا طبعى ولا أمريكا اللى عشت فيها سنين هتغيرنى لكن وصل حال بيتى للطلاق ولادى بيتفرجوا علينا ومحدش له موقف لا معايا ولا معاها ضامنين فلوسهم اللى بتوصل لهم منى ومراتى طمعت فى شقايا اللى كونته بمجهود سنين وحسب القانون الأمريكى مراتى أخدت نص فلوسى واضطريت لبيع كل ما أملك عشان تاخد نصه.

أنا مش عارف غلطت فى إيه عشان بعد العمر ده والتعب ده أخسر كل حاجة تعبت فيها وهل هاقدر أبدأ من جديد وإزاى وهل هى غلطتى ولا غلطة ناس ماقدرونيش.

أعمل إيه؟!

 

الحـل المقترح .. بداية جديدة

أنا متعودة ما أصدرش أحكام ولكن المنطق بيقول أن العيشة بينكم ما كانتش وحشة أوى من الأول..انتو خلفتوا أربع أولاد يعنى الظاهر أن المشاكل بدأت على كبر.. أما العيال كبروا..عندى إحساس إنك بتلوم مراتك على نتيجة تربية الأولاد مع أن الزواج راجل وست والأولاد نتاج أب وأم.. ودور الأب لا يقل أهمية عن دور الأم..يبدو أنك كنت مشغول طول الوقت بالعمل واعتبرت أن الأولاد مسئولية الأم لوحدها زى كتير من الرجال إللى بيرموا المسئولية على الأم لوحدها ومتخيلين أن مسوليتهم بس يصرفوا..الأب مشارك فى التربية زيه زى الأم يعنى لو الأولاد طلعوا كويسين فدى مسئولية الاتنين لو بايظين يبقوا الاتنين برضو.. علم النفس والتجارب والدنيا أثبتت أن الأولاد محتاجين أهلهم وأنهم نتاج أب وأم.

حتة إن هم أمريكان أكتر من عرب فما نقدرش نلومهم دا المجتمع إللى اتربوا بيه والإنسان خاصة الأطفال بيتأثروا بالمجتمع إلى بينشأوا فيه.. انتو حاطيتوهم وسط أمريكان. أصحاب ومدرسة وجامعة.. انتو  إللى خليتوهم يختلطوا بيهم وبيتفرجوا على أفلام أجنبى وبرامج وثقافة كاملةبتدخل جوا الدماغ ودور الأهل أنهم يحاولوا يربطوهم بثقافتهم الأصلية ودا مش دائما سهل..

أما حكاية أنه بقوا معتبرينك بس للفلوس فللأسف شباب كتير من الجيل دا كده.

وموقفهم المحايد من الطلاق دا تفكير غربى من منطلق أن الأهل أحرار فى قرارات حياتهم.

ومراتك مهتمة بالخروج وشكلها ممكن دا يكون لإحساسها بالوحدة..الستات أما بتبقى وحيدة بتحاول تعوض دا بشكلها.

عايز رأيى؟ صاحب أولادك..اتكلم معاهم من غير نقد وتوبيخ وكلام يوجع.. حاول تفهم دماغهم وتقرب منهم يمكن تعرف تكسبهم.

ومراتك قل لها عايز بداية جديدة..هى دلوقتى مش الغريبة بنت الناس إللى اخترتها.. دى أم عيالك.. صحتك مهمة حافظ عليها ومرض السكر أكيد أنت كطبيب عارف أن التوتر أكبر عدو للصحة.. حاول تبقى سعيد يا أستاذ سعيد. الحياة من غير عيلة موحشة جدا.. ومهما كانوا مختلفين عنك دول فى الآخر أولادك ودمك.. صاحبهم ورجعهم لحضنك.. وإن كبر ابنك خاويه.

والقرار قرارك.. الحياة من غير عيلة موحشة جدا..ومهما كانوا مختلفين عنك دول فى الآخر أولادك ودمك.. صاحبهم ورجعهم لحضنك.. وإن كبر ابنك خاويه..

والقرار قرارك.