الإثنين 23 مايو 2022
رئيس مجلس الإدارة
هبة صادق
رئيس التحرير
وليد طوغان

احكوا لى.. مع: رولا خرسا

معظم المشاكل لها حلول.. نحن نفكر معًا لإيجادها.. ممكن نخطئ وممكن نصيب المهم أننا نحاول.. والأهم ألا نيأس مهما تكاثرت همومنا.



ونذكر بعضنا البعض دومًا بالمثل الشعبى الجميل: تبات نار تصبح رماد.

 

أنــا مكتئــب

 

هى ليست مشكلة واحدة، بل عدة مشاكل وصلتنى ملخصها أنا مكتئبة أو أنا مكتئب. أحوال الدنيا جعلت الكثيرين يقعون فى براثن الاكتئاب.. عشان كده الأسبوع دا حخلى المقال عن الاكتئاب خاصة بعد إللى حصل لفتاة سيتى ستار ربنا يتغمدها برحمته.

 

الحـل المقترح .. عيــان مــش كافـــر!

 

أولا وقبل أى حاجة الاكتئاب مرض زيه زى الضغط والسكر

إزاى تعرف إنك مريض اكتئاب؟

مريض الاكتئاب بتظهر عليه أعراض ممكن كل حد يصاب بشكل مختلف.. أهم أعراضه فقدان الرغبة فى ممارسة الحاجات اليومية العادية يعنى مريض الاكتئاب ممكن مش عايز يقوم من السرير مايسرحش شعره ما يستحماش مايتحركش من مكانه..الحاجات العادية يبطل يعملها.

الإحساس بالعصبية والحزن.. يعنى على طول حزين ممكن يعيط من غير سبب كل حاجة بتخليه مضايق ومفيش حاجة بتفرحه.. يعنى بيدخل فى سجن من الحزن بيبقى صعب يخرج منه الإحساس بانعدام الأمل. بيبدأ يحس أن مفيش أى أمل فى الحياة وكأنه فى بئر مظلم مش شايف أى نور يطلعه منه نوبات من البكاء بدون أى سبب ظاهر. الإنسان المكتئب بيفضل يعيط كتير كأنه نافورة عياط ما بتخلصش.. حزن فظيع ووجع قلب وإجهاد من كتر العياط النوم: يا يناموا كتير هربا من المشاعر الفظيعة إللى بتؤلمهم يا ما يناموش خالص ويتحولوا إلى أشخاص عصبية جدا من قلة النوم.

صعوبات فى التركيز: مش بيعرفوا يركزوا لا فى قرارات ولا شغل ولا مذاكرة.. وعلى فكرة الاكتئاب بييجى فى أى سن..

صعوبات فى اتخاذ القرارات. أصعب حاجة على مريض الاكتئاب إنه ياخد قرار.. ولو اضطر حيقولك مش عايز حاجة عشان غير قادر على أى حاجة زيادة أو نقصان الوزن بدون قصد.. مريض الاكتئاب ممكن ياكل كتير أو يقطع الأكل.. عشان كدة ممكن وزنه يزيد أو ينقص. حساسية مفرطة: الإنسان الحساس إما يصاب بالاكتئاب بتزيد حساسيته بشكل مفرط .. أقل كلمة أو تصرف ممكن يخلوه يفقد أعصابه أو يعيط

إحساس بالتعب أو الوهن: طاقة صفر مش بيبقى قادر يتحرك أو حتى يعمل أقل مجهود. إحساس بقلة القيمة: بيحس إنه مالوش قيمة، محدش بيحبه، غير مرغوب فيه من كل اللى حواليه

فقدان الرغبة فى الكثير من الأمور الحياتية

أفكار انتحارية أو محاولات للانتحار. أكبر جرس إنذار أن الشخص مريض بالاكتئاب إما يبدأ يفكر فى الانتحار.. لو أنت حد قريب منه اوعى تطنش لازم فورا آخذه لطبيب عشان يوصف له مضاد للاكتئاب.. اوعوا تتهاونوا خالص لأنه فعلا ممكن يؤذى نفسه.

مشكلات جسدية بدون تفسير، زى صداع أوجاع فى الجسم.. كده.

مريض الاكتئاب مريض.. بلاش تكلموه عن الدين وإنه لو زهد فى الحياة يبقى كافر.. بلاش تتعاملوا مع المكتئب إنه مش مقدر نعمة ربنا.. دا مريض زى أى مرض عضوى.

وخدوا بالكم مريض الاكتئاب ممكن يخف ويرجع تانى وممكن يقضى عمره مكتئب بس الشطارة إنه يعرف يبعد عن مسببات اكتئابه عشان يحاول يحافظ على صحته النفسية.

لو عندك حد مريض اكتئاب أو أنت نفسك كده لا تتردد فى الذهاب لطبيب.. دى شغلتهم حيساعدوك تكمل حياتك بأقل قدر من الآلام.

والقرار قرارك.