الضحكة اللى راحت
الأربعاء 26 مايو 2021
كتب
شعر: مـى منصــور ريشة: مهـا أبوعمارة
بَطّل تمثيل
وكفاية عليك وعلينا ده دور
ازاى هتسيبنا دموعنا بحور
وعينيك فى قلوبنا محفورة
فى بيوتنا عمود مرسوم على فرحته سمورة
فى قلوبنا بيوت مفتوحة بحسك يا جميل
بَطّل تمثيل
هتموت إزاى
وأنا ليا معاك ألف حكاية
وقلوب اتخلقت للضحكة
كام ألف طريق مليون سكة
وعيال بتجلجل ضحكتها ع كام إفيه
صوت السوكسيه على شفطة شاى
سيبتلهم حزن وعلى سهوة
من غير باى باى
هتموت إزاى
حتى أن غيرت يا سمورة كل العناوين
هتعيش وتعشش فى قلوبنا لو روحت لفين
وهنفضل نضحك على صوتك
حافظين الإفيه والجملة لسنين وسنين
حتى إن غيرت يا سمورة كل العناوين
هتعيش وتعشش فى قلوبنا لو روحت لفين