احكوا لى.. مع رولا خرسا
معظم المشاكل لها حلول.. نحن نفكر معًا لإيجادها.. ممكن نخطئ وممكن نصيب المهم أننا نحاول.. والأهم ألا نيأس مهما تكاثرت همومنا.
ونذكر بعضنا البعض دومًا بالمثل الشعبى الجميل: تبات نار تصبح رماد
صاحبتى بتخمس فى وشى!
احنا 3 أصحاب بنات.. قولى بقى ستات بتجمعنا الأيام من سنين ورغم حبى لأصحابى بس أنا حزينة بسبب تصرفات واحدة منهن فاكران بحسدها.
أيوه زى ما قريتى كده.. صاحبتى اللى كبرت معاها فاكرانى بحسدها، بتخمس فى وشى وكل ما تعمل أدامى حاجة تعمل خمسة بصوابعها وكأنى اتخلقت عشان أحسدها ف الدنيا.
نفسى أسألها وأقولها إنتى ليه بتعملى كده معايا، شفتى منى إيه عشان بتعاملينى كده وحاطانى فى زاوية الحاسدين.
هى صاحبتى وبتجمعنى بيها الدنيا وبدون مقدمات وفِى أى حكاية بتحكيها لازم تجيب كلمة خمسة (جبت خمس كوبيات، مشيت فى 5 أماكن، اتفرجت ع 5 شقق).
أنا شكيت فى نفسى وسألت صاحبتى الثالثة بتاعتنا هو أنا بحسدكم؟؟
يا ترى أنا اللى حساسة بزيادة ولا صاحبتى اللى موسوسة، ولا العيب فيا؟
أما سألت صاحبتى التالتة قالت إنى ملحظتش خالص، طب هل أواجهها واسألها عشان ما يكونش فى نفسى شك؟
ولا أبعد واحفظ كرامتى؟ أنا صعبان عليا العشرة ولا يمكن أكون غلطانة فى دى كمان! قولى لى اعمل إيه ؟؟
الحـل المقترح .. بصى لعشرة السنين
أنا من اللى بيصدقوا بالحسد ما هو مذكور فى القرآن.. وبصدق إن فى ناس فعلا عينيها وحشة.. ودائمًا كان الخلاف حول تعريف الحسد.. خلينى أقول لكم تعريف الحسد فى اللغة العربية وبعدين نتكلم.
«الحسد مصدره حسده يَحْسِدُه ويَحْسُدُه، حَسَدًا وحُسودًا وحَسادَةً، وحَسَّدَه: تمنى أن تتحول إليه نعمته وفضيلته، أو يسلبهما، وحَسَدَهُ الشيءَ وعليه.
معنى الحسد اصطلاحًا:
وقال الجرجانى: (الحسد تمنى زوال نعمة المحسود إلى الحاسد).
وقال الكفوى: (الحسد: اختلاف القلب على الناس؛ لكثرة الأموال والأملاك).
وعرفه الطاهر بن عاشور فقال: (الحسد: إحساس نفسانى مركب من استحسان نعمة فى الغير، معتمنى زوالها عنه؛ لأجل غيره على اختصاص الغير بتلك الحالة، أو على مشاركته الحاسد).
يعنى نقول كده ببساطة حنمسك تعريف تعريف ونفصصه.
تعريف الحسد إما أن حد يتمنى لحد أن نعمته تزول.. يعنى دا مش بس حسد بس دا كمان شر حقيقى.. اللى يتمنى زوال النعمة عند حد دا حد شرير من الآخر.. ولو أنتى شاكة أن صاحبتك من النوع إلى ممكن تتخيل إنك من النوع الشرير إلى بيتمنى زوال النعمة لغيره فدى نظرتها ليكى أصلا وحشة ولا يمكن تكون صديقة حقيقية.
التعريف التانى: تمنى زوال النعمة من المحسود اللى الحاسد.. يعنى أن حد يبقى عايز النعمة الى فى إيد غيره تبقى فى إيده.
ودا برضو شر.. يعنى إيه حد يتمنى ياخد حاجة بتاعة حد؟ طبعًا شر.. ولو صاحبتك فاكراكى تتمنى تاخدى أى رزق عندها تبقى برضو نظرتها ليكى شر.. وبرضو لا يمكن تكون صديقة حقيقية.
أما الحسد المتعارف عليه فى ثقافتنا العامة غير كدة.. الحسد عندنا يعنى أن حد عينه وحشة، أو عينه تفلق الحجر. ناس كده تبص على خاتم إنتى لابساه يتكسر أو فستان يتقطع أو جملة زى «إيه دا جوزك مدلعك» تدبى معاه خناقة لرب السما وتروحى لبيت مامتك.. أو أم تتباهى أن «بنتها بتطلع الأولى» تلاقيها الشهر اللى بعده درجاتها نزلت نزولا غير عادى.
دول بقى مش بيتمنوا زوال النعمة ليكى دول النوع إلى عايز نفس النعمة اللى عندك تكون عنده...النوع اللى يقعد يبص لك ويقول جواه «يا بختها.. أو ياااا الفستان حلو حلاوة...أو يا بختهاعلى دلع جوزها.. أو إيه بنتى مش بتجيب الدرجات النهائية زى بنتها؟».
فيه ناس كده.. باصة لغيرها على طول...والمشكلة أنهم مش بيكونوا حاسين إن عندهم المشكلة دى.. وأنهم فى رأيى جواهم طاقة سلبية بتطلع ذبذبات بتتسبب بهذه الحوادث.
يبقى إيه؟
بصى بقى.. أنا دائمًا من مدرسة السؤال المباشر يعنى تقعدى معاها كده وتسأليها إنتى شايفة إنى بحسدك؟
طبعا مش أى حد حيرضى يعمل كده لأن الأمر يتطلب مواجهة هادئة قد يراها البعض أنها قد تؤدى إلى خناقة.. طيب إيه البدايل؟ اقعدى مع صاحبتك وكلميها بشكل عام عن الحسد وشوفى دماغها رايحة فين.. ووصلى لها رسالة غير مباشرة عن أن مش لازم يكون فيه دا بين الأصحاب.
وللناس اللى بتخاف من الحسد أقول لهم على شوية حاجات.
أولا إن الحسد لا يحدث بنية مبيتة بدليل أننا ممكن أحيانا نحسد نفسنا أو حد يهمنا بدون قصد وده بيبقى نتيجة زوايا فلكية متكررة بتحصل يومين كل شهر.. بس ده طبعًا ميمنعش إن فيه ناس عندها القدرة على الحسد ربنا يحفظنا.
قريت بحث مرة إن فيه فريق فى جامعة يابانية ابتكر جهاز قدر يرصد نبضة الحسد الصادرة من العين ويقيس تردداتها اللى بتختلف من شخص لآخر حسب قوة تأثيره.
عشان كدة فيه ناس بتحط خرزة زرقاء لأنه بيعتقد أنها بتوقف التردد بتاع الحسد اللى طالع من العين وتمنع الضرر.
بس الخرزة الزرقا لازم تكون حجر توركواز عشان تدى طاقة حماية بملامسة الجسم إنما لومعتمدين على اللون فى صد العين فالأحمر هو الأقوى وده اللى الفراعنة استخدموه لرد العين.
وأرجع لصاحبة المشكلة.. فى رأيى حطى كده قايمة بعيوب وحسنات صاحبتك.. لو المشكلة بينكم بس انها فاكراكى بتحسديها طنشى وأما تخمس قدامك خمسى انتى كمان.يمكن تلفتى نظرها لتصرفها اللى ممكن تكون بتعمله مع كل حد، يعنى حالة خوف عام من الحسد.. فيه ناس فعلا بتخاف من الحسد من كل حد.
ولو مشكلتها بس معاكى انتى.. عدى الحتة دى وبصى للعشرة والسنين.
وأخيرا اللهم احفظنا من الحسد والحاسدين.. والقرار قرارك.