أراجوز أراجوز إنما فنان
شعر : سيد حجاب
أراجوز أراجوز إنما فنان.. فنان.. أيوه أنا أراجوز ويجوز يا زمان أنا كنت زمان غاوى الأرجزة طيارى يجوز إنما لما الكيف بقى إدمان باجى أبص لشىء واحد أرى جوز! أرى إيه.. أرى إيه؟ أرى أرى أراجوز..! فلسان.. كحيان أيوا أنا فلسان إنما برضك.. راجل إنسان بضرب بالألف لسان ولسان وباكلها بعرقى ومش إحسان راجل والرجولية لاعضلات ولا ألابندة وسيما وحركات الرجولية الحقيقية ثبات.. قدام جبونية أى جبان أراجوز أنا واحمى أرى إيه.. أرى إيه أحمى قراريط الناس من مين؟ من الناس الأرى أرى إيه أرى إيه؟ الناس القراميط الملاعين ماهو أصل انا مش من الأرى أرى إيه مش من القراطيس ولو الحال مال مااقعدش أنا على أرى إيه أرى إيه؟ قرافيصى وأطنش ع الأندال لازم اشك الأندال مهموز.. وأدوس ع اللى افترى والعنطوظ م أنا أرى إيه أرى إيه؟ أرى أرى أراجوز.. أراجوز وشجيع.. والدنيا ميدان فارس.. حارس.. واقف ددبان واذا بان للشر نيبان بحمى الغلبانه والغلبان وشجاعتى مهياش ف الطاخ طيخ دى شجاعة تفكير وتمخميخ الأرض اضربها تجيب بطيخ بذكاوتى واخلى الخلا بستان أراجوز انا والدنيا أرى إيه؟ قرشانة ياما قرمتنى فى لباليبى وانا كبير فسرحت انفخ أرى ايه أرى ايه؟ أراغيلها واغنى ياليلى ياعين واتمسخر على ارى ايه أرى ايه اراذلها الفجرة الطماعين واضحك على مل صبى وعجوز ع اللى بيتنطط فرقع لوز ماانا ارى ارى ايه أرى أرى أراجوز