مايوهات تفصيل أو «تجميع»

« لو سمحتى عايزة مايوه محجبات.. موجود يا فندم اتفضلى دى تشكيلة الـ Jump suits ودى تشكيلة الجيبات القصيرة، وهنا مجموعة التربوهات، وهنا كمان تشكيلة من البوليروهات اختارى اللى يعجبك»..

 «دول عاجبنى ممكن مقاسى عشان أدخل أقيس؟ .. اتفضلى البروفة هناك»، وبدأت أرتدى القطع التى اخترتها والتى شكلت لى مايوهًا رقيقًا يليق بى، وألوانه تناسب لون بشرتى وألوانى المفضلة فى الملابس، عبارة عن سالوبيت أسود قماشته ليكرا، وبه نقوشات من الجلد الأسود، أضافت إليه مظهرًا جذابًا، وبوليروه أسود كات منقطًا بالأبيض، وبه حزام يدور حول وسط الظهر كى يأخذ شكل الجسم، وأخيرًا «تربوه» منقوش بنفس شكل البوليروه يوضع فوق الرأس لحماية الشعر من مياه البحر المالحة.
ها أنا أرتدى المايوه الذى رأيت صورته على صفحة المحل على الفيس بوك، بعد نصيحة زميلة العمل، خرجت من البروفة لأدفع ثمنه وأطير للإسكندرية، لكن الصدمة ألجمتنى لبضع ثوانٍ بعد أن سمعت أسعار قطع المايوه التى اخترتها، والبائعة تقولها بكل بساطة..
«الـ Jump suit بـ 640 يا فندم والبوليروه بـ 350 والتربوه بـ 90»، ، «القطع اللى اخترتيها كلها بـ 1340 جنيه يا فندم»، فرددت عليها: «ليه هو أنا هشترى مايوه ولا فستان خطوبة»!
- دى أسعارنا يا فندم وأقمشة المايوهات غير أى مكان تانى وتستحمل، ده غير إن عندنا تشكيلة كبيرة ومتنوعة وتناسب كل الأذواق وألوان كتير جدًا، وماتنسيش حضرتك بتشترى مايوه محجبات وده سعره غير المايوه العادى، وممكن حضرتك تختارى سالوبيت تانى بـ 500 جنيه بس بدل اللى اختارتيه».
 واستمر الجدال بينى وبين البائعة لأكثر من 10 دقائق حول أسعار ملابس البحر هذا العام، خاصة أنها بعيدة تمامًا عن أى ماركات شهيرة، فهى صناعة محلية جدًا، فلم تختلف أسعار مايوهات غير المحجبات، سواء القطعة الواحدة أو القطعتين، ففى بعض محال وسط البلد والدقى والهرم وصلت الأسعار لـ 700 جنيه وأكثر.
قررت حينها أن أشترى فقط البوليروه والتربوه الذى أعجبنى، وأن أشترى باقى القطع منفردة من مكان آخر، بديلاً عن السالوبيت، ولم تكلفنى سوى 100 جنيه فقط، وبدلا من أشترى قطع مايوه واحد بـ1500 جنيه، اشتريتها بـ 400 فقط لا غير، وعدت للمنزل وأنا فخورة وراضية تمامًا عن تصرفى الذى رأيته انتصارًا على الاستغلال!
مايوهات أونلاين
«بشترى المايوهات أون لاين من الفيس بوك عن طريق صفحات بتبيع المنتجات، أختار الموديل اللى يعجبنى وأبعت رسالة للمعلن عن المنتج وأعرف التفاصيل، الخامة والأسعار والمقاسات والألوان والموديلات المختلفة، ونتفق على مكان معين يوصلى الحاجة فيه وأدفع له سعرها، وأحيانًا تصل لحد البيت، وأغلى موديل لا يتعدى  الـ 400 جنيه».
 هكذا قالت رنا حسن، عن تجربتها فى شراء مايو للمحجبات من على صفحة «تشكيلة مايوهات ياسمينة»، اختارت رنا المايوه واتفقت مع من تراسله على الصفحة على توصيله لأقرب مكان لها ودفعت سعره.
«كل مايوه ليه سعر حسب الخامة، الموديل اللى يعجبك ابعتى صورته وقوليلى وزنك كام وأنا أقولك السعر والخامة.. تمام ده عاجبنى خامته إيه؟ .. الخامة تركى دايفنج، طارد للمياه والقماشة الأصلية روعة بـ 375 جنيهًا»، «مش كتير 375 جنيهًا! .. الخامة ممتازة يا فندم والقماشة مطرزة مش طباعة، وحضرتك ممكن تنزلى المحلات تشوفى الأسعار والخامات رديئة وموديلات تقليدية، ومفيش مايوه محترم أقل من 800 جنيه».
 هكذا ردت إحدى البائعات المروجة للمايوهات على السوق الإلكترونية على الفيسبوك عندما سألتها هند علام عن أسعار المايوهات، وقررت شراء مايوه أسود منقوش برسومات أمواج البحر وألوان الشمس.
 المايوه التفصيل
«لفيت على محلات المايوهات وأخدت فكرة عن الأسعار والخامات وأشكال الموديلات، وأنا مقررة أنى مش هشترى، لكن كنت عايزة أعرف نوعية الأقمشة المتفصلة منها المايوهات، واخترت كذا موديل عجبونى وخدت صورهم على الموبايل، ونزلت اشتريت الأقمشة المناسبة لملابس البحر والألوان اللى عجبتنى وروحت للترزى اللى باتعامل معاه، ومعايا الأقمشة وصور الموديلات، وفصلت المايوهات ليا أنا وإخواتى، الترزى خد مقاساتنا وسلمنا المايوهات بعد أسبوع.. مايوهات أحسن من الجاهزة وبأسعار مازادتش عن 300 جنيه للمايوه الواحد وبكل القطع»، وهذا هو البديل الثانى الذى لجأت له بعض الفتيات بعيدًا عن أسعار المحلات.