نبيلة قنديل
مؤمن المحمدي
في الخمسينيات
نبيلة قنديل اتجوزت مزيكاتي
مش معروف أوي
اسمه على إسماعيل
وليه أخ ممثل
بس برضه مش معروف أوي
اسمه جمال إسماعيل
نبيلة وعلى
عملوا دويتو فني
هي تكتب وهو يلحن
واشتغلوا من نص الخمسينيات التاني
لـ حد السبعينيات
شغل كتير اشتهر
زى رايحين شايلين فـ إيدنا سلاح
الأرض لو عطشانة
فدائي
أم البطل
شغل كتير لـ الثلاثى المرح
ومن أشهر الحاجات اللى عملوها
أغنية «الطشت قال لي»
نبيلة وعلى خلفوا ولدين وبنت
كلهم كانوا فنانين
وكلهم ما عملوش أسماء كبيرة لـ ظروف مختلف
شجون على إسماعيل (فرقة المصريين)
مصطفى على إسماعيل (ملحن لو بطلنا نحلم نموت)
حسين على إسماعيل (ملحن برضه)
مصطفى وحسين ماتوا كمان صغيرين نسبيا
* * *
في أواخر التلانيات أوائل الأربعينيات
كان فيه بنت طالعة بـ سرعة الصاروخ
اسمها سعاد وجدي
سعاد كانت مونوليجست مشهورة
والصالات بـ تتخانق عليها
وكانت بـ تشتغل كتير مع رتبية وإنصاف رشدي
وقتها كان فيه ممثل ومونولجست مستجد
لسه بـ يحاول يشق طريقه
اسمه إسماعيل ياسين
إسماعيل حب سعاد وجرى وراها
لـ حد ما اتجوزها
بس هي كانت مقلقة
إن ارتباطها بيه يخصم من رصيد نجاحها
وفعلا ما نفعش يستمروا واطلقوا
سبحانه العاطى الوهاب
بعد الطلاق
بدأ نجم إسماعيل ياسين يطلع يطلع يطلع
لـ حد ما بقى نجم الشباك الأول
سعاد خدت الزحليقة لـ تحت
وانتهاء الحرب العالمية التانية
جه بـ الخراب على الصالات
سعاد فضلت تنزوى تنزوى تنزوي
لـ حد ما طلعت معاش مبكر
واعتزلت
حتى اسمها غيرته
واتجوزت ملحن لسه بـ يبدأ طريقه
كانت قابلته
لما كان بـ يلعب مزيكا عند رتيبة وإنصاف رشدي
الملحن دا
كان اسمه على إسماعيل
والاسم الجديد لـ سعاد وجدى بقى إيه؟
بـ الظبط
نبيلة قنديل
أسرار
تاريخ البشر مليان بـ الألغاز
اللى ما أعتقدش هـ نقدر نحلها
مين ممكن يعرف سر بناء الأهرام
أو سر قارة أطلانطا
أو سر وفاة محمد بن عبدالله
أو سر دهب هتلر
أو سر «جاك» السفاح
أو سر كراهية روز اليوسف لـ فاطمة رشدي
مقابل محبتها لـ بديعة مصابني
قال تعالى
وما أوتيتم من العلم إلا قليلا
ونعم بالله
سعاد أحمد
111 سنة على ميلاد سعاد أحمد
لـلأسف اسمها مش مشهور
مع إنه مؤكد
مفيش مواطن مصرى ما يعرفهاش
ولو فيه حد مش عارفها
لازم نسحب منه الجنسية فورا
مش هـ أكلمك عن فيلم وجرافيا سعاد
أفكرك بس بـ دورين ليها
الأول كانت حماة لبلب في فيلم شمشون ولبلب
وتقريبا دى كانت أول وآخر حماة
متعاطفة طول الوقت مع خطيب بنتها
مع إنه مش غنى ولا مريش ولا يحزنون
كل ما هناك إن لوزة بـ تحب لبلب
كما أنها قدمت أنموذجا لـ الحماة المثالية
لما لقت بنتها طالعة السطوح
طبعا عشان تقابل حبيبها
فـ سألتها:
رايحة فين يا لوزة؟
رايحة يا ماما أأكل الحمام فوق السطح
فـ ناولتها طبق بسبوسة
وقالت لها:
طب خدي
يمكن الحمام عايز يحلى بقه ولا حاجة
أما دورها الأهم والأروع على الإطلاق
فهو حماة ابن حميدو في فيلم ابن حميدو
مرات حنفي
اللى كل ما ياخد قرار ما يعجبهاش
كل اللى بـ تعمله إنها تقول
حنفي!
فـ يرجع فورا في كلامه
سعاد أحمد
= مصر التي في خاطري
ربنا يطول فـ عمرها
يابانى أصلى
محمود السعدنى الرائع
بـ يحكى إنه لما كان في السجن
كان معاه اتنين بحارة
واحد مصرى وواحد ياباني
خرجوا من السفينة بتاعتهم
فـ اتقفشوا بـ مخدرات
واطسوا 25 سنة
فـ المصري طول الوقت
عمال يحبط في الياباني
ويقول له إن مستقبلهم راح
وإنهم هـ يفضلوا هنا
لـ حد ما يموتوا وهم عواجيز مرضى
ويقول له:
شايف الأكل
شايف الشرب
شايف النومة
كل دا لـ إن المصري
بـ يقنع الياباني
إنهم يروحوا ينتحروا
ويخلصوا من العيشة دي
أخيرا اليابانى اقتنع
ورسموا خطة يجيبوا الحبال والذى منه
أكيد حضرتك توقعت
إنه لما جت ساعة الصفر
اليابانى انتحر
والبحار المصري ما عملش حاجة
وكمل حياته عادي
وفضل لـ حد ما مات بعدها في السجن
عجوز مريض
بس كان دايما على وشه ابتسامة
يابانى تانى
بـ مناسبة اليابانى بقى
زمان لما طلع التليفون النوكيا جديد
واكتسح السوق
كان معروف إنه فنلندي
ولو مش فنلندى يبقى مش أصلي
رحت أشترى تليفون
من شارع عبدالعزيز
وسألت البياع:
عمو
هو التليفون دا فنلندى أصلى ولا إيه نظامه؟
قال لي:
عيب يا أستاذ
ما عندناش حاجة مضروبة
فنلندى أصلي
«ميد إن جابان»
الغريب بقى إنى اشتريته