يا مسهرنى

ماخطرتش على بالك يوم تسأل عنى    وعنيه مجافيها النوم يا مسهرنى
أنا قلبى بيسألنى إيه غير أحواله    ويقول لى بقى يعنى ما خطرتش على باله
أمال غلاوة حبك فين        وفين حنان قلبه على
وفين حلاوة قربك فين        فين الوداد والحنية
يا ناسينى وإنت على بالى    وخيالك ما يفارق عينى
ريحنى واعطف على حالى    وارحمنى من كتر ظنونى
لا عنى بيهواها النوم    ولا باخطر على بالك يوم
اسأل عنى يامسهرنى
غصن أول
اسأل عن اللى يقضى الليل    بين الأمل وبين الذكرى
يصبر القلب المشغول    ويقول له نتقابل بكره
وبكره يفوت وبعده يفوت    ولا كلمه ولا مرسال
وهو العمر فيه كام يوم    وأنا بعدك على طال
ياناسينى وإنت على بالى..
غصن ثان
يا مسهر النوم فى عنيه    سهرت أفكارى وياك
الصبر ده مش بايديه    والشوق واخدنى ف بحر هواك
أقول لروحى وأنا ذنبى إيه    يقول لى قلبى حلمك عليه
مصيره بكره يعطف علينا    ونبقى نعرف هجرنا ليه
ياناسينى وإنت على بالى..
غصن ثالث
تعالى خلى نسيم الليل    على جناح الشوق يسرى
الهجر طال والصبر قليل    والعمر أيامه بتجرى
طالت الايام           تعالى لى قوام    دانا عندى كلام بدى اقوله لك
أنا عندى كلام وفى قلبى هيام أوصفهولك
ونعيش أيام ولا فى الأحلام
يا ناسينى وإنت على بالى    ارحمنى من قسوة قلبك
ريحنى واعطف على حالى    خلينى أتهنى بقربك
وأنا عينى بيهواها النوم        ولا أشكى ولا أقول لك يوم
اسأل عنى يا مسهرني