من بابا نويل إلى بابا غنوج

بقينا رجل جوه 2015 ورجل فى 2016 عقبال ما ندخلها بالرجل التانية.. وتتقطع رجلينا من 2015.. اللى كانت كبيسة كعادة 8 سنين فاتو.. والنهارده مش هشرح خلطة الترايفل ولا ازاى تخسى فى 30 دقيقة.. أنا النهاردة جاية أرصد واقع ..
يا جماعة اللى بيودعوا 2015.. ممكن نحتفل عادى فى أى مكان نتبسط.. ونلبس أقنعة زى فاتن حمامة وعمر الشريف ونطفى النور على الساعة 12.. وتشطحوا بخيالكم لدرجة إنكم تشربوا فيروز تفاح على إنه حاجة أصفره.. بس اللى حابه أقوله لكم عشان منخسرش بعض ونروح ع «القسم».. مفيش يا جماعة حاجة اسمها بابا نويل ... عشان متتنكدوش فى أول السنة.. للأسف كلنا بنستنى مفاجآت فى نهاية السنة وهدايا من اللى بنحبهم على أساس إنهم بابا نويل حتى لو واحدة صحبتى.. بستنى اليوم ده تقلب راجل وتبقى بابا نويل.. ولأن المثل بيقول «الغرقان بيتعلق بقشة».. وعلى الرغم إنه مش معقول تنقذنا «قشة» بس المثل حب يوصلك إن الغرقان بيحاول يعمل أى حاجة حتى لو شيء مش مقنع بس يخرج من اللى هو فيه.. واللى يستدعى الدهشة والغرابة بشكل أكبر من كده إن الحزانى والتعساء واللى نفسهم فى هدايا ومفاجآت تهون عليهم عشان آخر السنة يبقى فيها حاجة عدلة بيعلقوا كل طموحاتهم على  قشاية من نوع «بابا نويل» طب بذمتكم الراجل ده ملوش أهل يسألوا عليه؟ هيتحمل إيه ولا إيه ... وبعدين ما هو متحمل طول السنة وبيجيب فى حاجات من غير ما يبقى نويل يعنى.. وفرضا لو بابا نويل جبلك حاجة من نفسه يبقى آخره طقم اكسسوارات من عشق البنات بـ 2.5 يعنى مش لازم سقف طموحك يعلى  لجاكيت بـ 700 جنيه من زارا ولا علبة ميكاب مستنية حبيبك ولا جوزك  يدخلك بيها وهو أصلا مش عارف يقرا اسمها.. بالذمة يجبهالك ازاى..  المشكلة إن بابا نويل الخيالى اللى بييجى فى القصص بيحقق أمنيات بسيطة محدش طلب منه خاتم عيار 22 مثلا ولا بوت بـ 500 جنيه.. هو حلاوته فى بساطته وبييجى فى القصص اللى اتصدرت لنا إنه يحقق أمنيات من نوعية اللى نفسها تخس أو نفسها تبقى شبه نيكول كيدمان ولا نفسها تبدل شخصيتها مع أختها.. وتنام وتصحى ع السنة الجديدة وهى محققة أمنيتها.. كل ده قد يبدو واقعيًا عندما تطلبين من «بابا نويلك» أيا كان هذا النويل حبيبك، أخوكى، باباكى، جوزك.. إنه ياخدك راس السنة فى فندق لأن ربنا اللى بياخد.. أو يجيبلك هدية تمنها تلات أرباع المرتب اللى هو سالفه أصلا من شهرين.. متطلبيش منه حاجة أكتر من 100 جنيه لأنك لو جربتى تطلبى أكتر إما هتلاقى الترابيزة لبست فى وشك أو ساعتها «بابا نويل» هيسيب لكم البيت وهتبقى إنتى بابا وماما وأنور وجدى.
وأحب أقول لكل الطموحين واللى مستنيين من موقعى هذا.. بابا نويل يا جماعة محصلش حتى قشاية تتعلقوا بيها لأنه «معداش على مصر».. - مع الاعتذار للأغنية -  وحتى لو تواجد هيكون بالغلط فى أوروبا والدول المتقدمة..  فده لأن عوايدهم كده العيد بتاعهم مينفعش من غير بابا نويل.. زى العيد عندنا مينفعش من غير كحك.. وطالما بابا نويل ده من نسج الخيال.. قومى كده شمرى وانسجى فى خيالك أى بابا تانى غير نويل نرحمه السنة دى يمكن ربنا يفتحها علينا.. إيه الفرق يعنى بين بابا نويل وأى بابا تانى.. روحى لبابا بورتو، ولا بلاش هيقطم وسطكم مصاريف.. طيب خليكى ملكة زمانك.. واطلبى «بابا جونز» هتجيلك بيتزا اختارى إن شاء الله كل شريحة بطعم، بس ده هيفرحك مؤقت لأنك بعدها هتبقى شبه الدب القطبى من الكالورى اللى فيها.. أقولك .. متعلقيش طموحك فى أكتر من «بابا غنوج» ونخليه احتفال مصرى وناخد السبق كل راس سنة بابا غنوج ونخليلهم بابا نويل مش عايزين نتعلق بالقشة دى لا تقطم ضهر البعير ومتقدريش يا جمل  تصمدى السنة الجديدة لما تتصدمى فى بابا نويلك.. وأهى  قشة جنب قشة.. هتكمل المقشة.. اتفضلى خديها وكملى كنس وبطلى خيالك يشطح وينطح لبعيد.. هو احنا وش بابا نويل برضو؟! •