نمرة ع التليفون

شعر: مدحت العدل
نمرة ع التليفون صاحبها مش موجود
هو ف لحظة اختفى وهى ليها وجود
كل أما أقول أمسحها إيديا تخذلني
مكتوبلنا نفترق وبينا خيط مشدود
•••
علمنى أكون طيب مهما الصحاب خانوا
وكل شيء هين والشرفا بيبانوا
وهو كان السهل فى صعوبة الدنيا
وكان كمان الحياة والكون وألوانه
•••
الصوت اللى كان عالى أجش خلاص
ساكت كما الحزن النبيل للناس
والرهبة مالية المكان بالموت
إحساس مايتوصفش يا غربة الإحساس
•••
وكان شريك الألم والشوق وأحلامي
وهو اللى مد إيديه ف فجر أيامي
سابنا لمين الخال وعمدة الجدعان
النأب كان العدل والمبتدأ سامى.
•••