صباحات

نقشنا حيطانها أحلامنا

‎كتبنا عليها أسامينا

‎أنا نفسى أكون ظابط

‎وأنا دكتور

‎أنا محمد وأنا مينا

‎نشيل الصبح أقلامنا

‎ننادى بدعوة ترضينا

‎ونقف كلنا واحد

‎طابور واحد

‎نردد كلنا واحد

‎نوحد كلنا الواحد

‎ونهتف باسمها تحيا

‎بلدنا المولى يحرسها

‎فى حوش المدرسة الواسع

‎فى صفحة كبيرة فى الكراس 

‎رسمنا حلمنا الناصع

‎ضفاير ورد فوق الراس

‎لعبنا جرينا غنينا

‎صباح فتاح

‎صباح مرشوش عليه فرحة وآخره براح

‎تسع تسطر يدوب تستر

‎على عصفور بيتشاقى

‎ف روحى وبرضو حيشانى

‎صغار بنسابق الأيام عشان نكبر

‎كبرنا ونفسنا نرجع صغار تانى

‎عيال نونو 

‎شنط بتخبى ياما حاجات

‎ساعات بنحايل الأيام عشان تجرى

‎فتجرى وتحايلنا ساعات

‎بتوكة ومريلة كحلى

‎بنزرع يومنا كله عيون

‎عيون بتنادى أيامها

‎وتجرى تجيبها فين ما تكون

‎أمل وحياة 

‎وبكرة فى مدرسة وحصة

‎جرس يضرب

‎ويخلص درس أو يبدأ

‎وننقش حلمنا ع الحيط

‎ونرسم نور وشمس وبيت