صباحات
مى منصور
ارسم حروفك بالوجع
واياك تئن
يا تحن لآخر سكتك يا بلاش تحن
ضِل اللى ماتوا بالحياة
أوسع كتير
من ضِل أموات التراب
توب السراب
طمعان ف أكبر م اللقا
والعتمة حاوى وليها أكتر من جراب
يا عُمر ماهوش مبحبح صدره خايف م البراح
يا كل ضحكة بتختشى تحضنى لحظة لـ انشكاح
يا كل حلم عيونه أصغر م المباح
فارق بخاطرك قبل م يفوت الأوان
الكل فارق وإنت وحدك ف المكان
قاعد ترصرص ف الكراسى
بسم ناس معادوش يحنوا للساعات
نسيوا المعاد
بزيادة عاد
انفض كفوفك من تراب الروح
وحاسب ع اللى جاى
بكَّاى يا عُمر بيشتهى حضن القبور
واخد فـ وشه مش مسامح ف الندور
بعدت عتابه من حبابُه يا مين يزور
معذور يا ضىّ بيختفى حد الغروب
اهرب على كتاف القلوب وعتِّق فـ الهروب
اهرب وحاذر صرختى وسط الدروب
ياقطر أخرس معصوب العينين
مش باقى منى غير شوية طيبين
سكاكين خُطاك ع السكة زادت حبتين
مساكين بتنزف وانت مش سامع آنين
ياليل مدارى ع اللى ماتوا واللى عاشوا محرومين
هيدارى ايه صبار بيعشق ميتين
وهتعمل ايه الضحكة ف القلب اليتيم