احكوا لى .. مع: رولا خرسا
معظم المشاكل لها حلول.. نحن نفكر معًا لإيجادها.. ممكن نخطئ وممكن نصيب المهم أننا نحاول.. والأهم ألا نيأس مهما تكاثرت همومنا. ونذكر بعضنا البعض دومًا بالمثل الشعبى الجميل: تبات نار تصبح رماد.
أنـــا حبيـــــت
أنا حبيت واحد، عشقته والله العظيم أكتر من نفسى وحافظت عليه وكان ناس بتتقدملى والله ماتترفض بس أنا عاوزاه هو وبحبه، وقالى: قدامى سنة وحرجع تانى قالى فرح أخويا وهكلم أبويا علطول فرح أخوه المفروض فى شهر عشرة، المهم حصل خناقة وسبنا بعض، صحبتى تعتبر أختى صالحتنا على بعض ورجعلنا تانى عرفت بعدها إنهم بيكلموا بعض بس صحاب عادى عند بعض على الفيس وكان كلام زى إزيك لو عوزتى حاجة انتى أختى كدا يعنى، المهم جه مرة قالى عاوز أقولك حاجة بعد رغى كتير قالى صحبتك قالت لى أنا بحبك بس مش هينفع عشان صحبتى متستحقش منى دا وعرفت أنهم كانوا بيكلموا تليفون أنا فضلت أضحك ومصدقتش وواجهتها حلفت يمين تلاته ما حصل وهوا حلف أنه حصل وأنا صدقت صاحبتى لأن هو كان بيكدب عليا فى حاجات كتير وكنت باسكت عشان عبيطة وبحبه طبعا أنا مكملتش معاه علشان اللى قاله على صاحبتي وأنه قهرنى فى قلبى أنه بص لصاحبتى المهم قولتله مش هينفع نكمل مع بعض وخلاص ومجبتش بقى سيرة أى حاجة وفعلاً سبته وعدى على الوقت فترة كبيرة لقيته بيرن عليا النهارده يطمن عليا حتى أنا استغربت ولقيته بيقولى محبتش غيرك واتغيرت علشانك وأنا عارف إن خلاص كل حاجة انتهت ربنا يسعدك، أنا اتقهرت تانى هوا لى عمل فيا كدا أنا فعلا نفسيتى تعبت والله، أعمل إيه؟
الحـل المقترح .. علاقـــة معقدة
على قد ما فهمت من الرسالة إن الحكاية إنك كنتى بتحبى واحد وهو صاحب صاحبتك فانتى سبتيه وبعد فترة رجع لك وبتسألينى ترجعى له وألا لا.. أنا مصدقة إن الإنسان ممكن يتغير بس دا فى حاجات وحاجات.. إنما أما تبقوا لسه ما تجوزتوش ويصاحب صاحبتك حيعمل إيه بعد الجواز؟ الجواز علاقة شديدة التعقيد لو مكنش الطرفين قد المسئولية العلاقة حتفشل.
اللى يخون مرة يخون تانى.. فيه ناس تقولك الكلام عادى بس أنا بقول إنه يقول لصاحبتك إنه بيحبها فدا مش عادى.
والكذاب بيفضل كداب وأسوأ عيشة بتكون مع الكداب.. حتعيشى فى جحيم لأنك حتحسى طول الوقت إنه بيكدب عليكى..
لاحظت إنك قلتى على نفسك عبيطة..عمر الطيبة ما كانت عبط بالعكس الطيبة هى اللى بتكسب دائما لأن الكداب بينكشف والخاين بينكشف، أما الطيب فواضح..وربنا بيدى كل واحد على قد نيته.
بتقولى إنك حبيتيه أكتر من نفسك وعشقتيه جدا.. طيب هو قابل دا إزاى؟ الحب الكبير لازم يقابله حب أكبر.. والجواز أكيد الحب فيه مهم جدًا، بل هو أهم حاجة بس لوحده لا.. ما يكفيش.
الجواز يعنى حد مخلص يقف جنبك فى مشاكلك، يعنى الأمان والاطمئنان.. إنك تعيشى جنب الراجل اللى نفسك يبقى أبو أولادك مش عينك وسط راسك يا ترى هو راح فين؟
حيحب صاحبتى؟حيحب قريبتى؟
الوجع اللى انتى فيه لازم يكون سبب إنك ما تفكريش ترجعى له.. يكون السبب إنه يقويكى وينور بصيرتك عشان اختيارك الجاى يكون على أساس قلب وأخلاق.
انتى قلتى إنك رفضتى عرسان كتير عشانه.. إوعى يكون السبب فى إنك عايزة ترجعى له خوفك من أنك ما تتجوزيش؟
القعدة من غير جواز أرحم من الزواج من شخص غير مخلص.
سيبيه واقفلى الصفحة وربنا يكتب لك الخير.