احكوا لى.. مع :رولا خرسا
معظم المشاكل لها حلول.. نحن نفكر معًا لإيجادها.. ممكن نخطئ وممكن نصيب المهم أننا نحاول.. والأهم ألا نيأس مهما تكاثرت همومنا.
ونذكر بعضنا البعض دومًا بالمثل الشعبى الجميل: تبات نار تصبح رماد.
3 عرسان
صباح الخير يا أستاذة رولا، عاوزة آخد رأيكم فى موضوع مهم ويارب يكون عندكم حل عشان أنا مش عارفة أفكر دلوقتى، أنا منفصلة بقالى سنة ونص مطلقة للمرة الثالثة من أبو بنتى، وحاولنا نرجع قالوا لازم محلل، وأنا وهو رافضين فكرة المحلل.
وأنا بقالى فترة ظروفى صعبة جداا ومش قادرة أواظب بين شغلى وبين بنتى وبنتى متعلقة بيّا جداااااا، أنا نفسى أقعد معاها وأراعيها وفى نفس الوقت لازم أشتغل عشان أصرف عليها، تعبت جداااااا ومش قادرة أوزنها، حاسة إنى ظالمة بنتى جدااا قدّامى 3حلول.
واحد عريس عنده 80 سنة وظروفه المادية كويسة جداااااا جداااا جداااااا وبرستيج ووضع اجتماعى، اتنين محلل أرجع بيه لأبو بنتى لأنها متعلقة بيه جدًا بتحبه جدًا بس هو ظروفه المادية صعبة، ثلاثة بيحبنى بردو برستيج ووضع اجتماعى ومش عاوزنى أشتغل وهو يساعدنى وبدون مقابل ولكن مش عاوز يتجوز رسمى. وأنا مش موافقة على كده ولكنه بيخوّفنى من إنى أتجوز الراجل إللى سنّه كبير بيقولى هعملك مشروع وماتتجوزيهوش، وأنا محتارة ومش عاوزة آخد قرار أندم عليه ومش عارفة أتصرف.. إيه رأيكم؟
الحـل المقترح .. فين المشاعر؟!
عزيزتى مرسلة المشكلة..عمر الجواز ما يكون بيعة وشروة..باختصار كده.. يعنى واحد عنده تمانين سنة عايزة تتجوزىه أكيد عشان فلوسه ووضعه الاجتماعى وجواكى بتقولى يمكن يتكل وتورثيه.. سؤال مهم أنت غاسلة وضامنة جنة؟ زى ما المثل بيقول يعنى تعرفى منين الزوج دا كريم والا بخيل؟ بصحته والا عايز ممرضة؟ ربنا يدى الجميع الصحة بس السّن له أحكام كلنا مع الوقت صحتنا بتتدهور وبنبقى محتاجين إيد تسندنا؟ والأهم مين فينا ضامن يعيش لبكرة؟ أنتى نفسك ضامنة تعيشى لبكرة؟
نروح للتانى راجل غنى بس عايز يتجوزك عُرفى ويعمل لك مشروع.. يعنى من الآخر بيزنس مقابل علاقة شرعية.. وحتبقى الحكاية إنكم مش عايشين مع بعض إنما يزورك من وقت للتانى. بيزنس بيزنس.. هو دا اللى حيريحك؟!
وبالنسبة للأول والتانى سؤال مهم: فين المشاعر؟ وبنتك؟ حيتعاملوا معاها ازاى؟ مش ممكن يضايقوا منها ويقولوا لك إديها لأبوها؟
تيجى لأبو بنتك اللى طلقك ٣ مرات.. أنا شايفة إنكم استنفذتوا مرات المحاولات.. حتى لو جه محلل فإما ترجعوا حتطلقوا تانى.. شكلكم أنتو الاتنين مش واخدين بالكم إن عندكم طفلة محتاجةاهتمامكم أولًا.. الطلاق عندكم سهل ناسيين تبعات الكلمة إنها أمّا بتطلع بيبقى كل واحد خلاص فى حتة بعد ما كنتم فى حتة واحدة..عشان كده بتقول محدش يخلف غير إما يبقى واثق أنه حيعرف يشيل مسئولية الطفل اللى حيجيبه للدنيا.
نيجى للشغل.. بتقولى تعبتى وعايزة تهتمى ببنتك..هل أبو البنت غير قادر على أنه يتكفل بها؟طب وأنتى؟ عايزة اللى يصرف بس ما تشتغليش؟ كتير أوى نفسهم بكده بس الحياة صعبة وكل واحد بياخد على قد تعبه.
أخيرًا؛ لاحظت أن كل الرسالة مافيهاش كلمة بحب طليقى أو بحب التانى أو التالت.. وأنا شخصيًا الجواز بالنسبة لى علاقة مقدسة جدًا.. مبنية على التفاهم والمودة والرحمة..هى ميثاق غليظ وتعاون وسَند.
قبل ما أقول أى حاجة يا ريت أنتى وطليقك تفكروا فى بنتكم دائمًا وفى مصلحتها.
وأخيرًا عايزة بيزنس خدى الأولانى أو التانى مش فارقة.
عايزة جواز بمعنى الكلمة يبقى كمّلى شغل لغاية ما ربنا يبعت لك الشخص المناسب.. والقرار قرارك.