الجمعة 29 مارس 2024
رئيس مجلس الإدارة
هبة صادق
رئيس التحرير
وليد طوغان

احكوا لى.. مع رولا خرسا

معظم المشاكل لها حلول.. نحن نفكر معًا لإيجادها.. ممكن نخطئ وممكن نصيب المهم أننا نحاول.. والأهم ألا نيأس مهما تكاثرت همومنا.



ونذكر بعضنا البعض دومًا بالمثل الشعبى الجميل: تبات نار تصبح رماد

خايفة من الجواز

هى مش مشكلة قد ما هى ظاهرة عامة مستوقفانى وحابة أعرف رأى حضرتك فيها.. ليه انتشر قتل الستات للرجالة؟ وليه قليل أما تلاقى أزواج سعداء؟ ليه انتشر الطلاق؟ أنا مخطوبة وبحب خطيبى بس خايفة من الزواج.

 

الحـل المقترح .. تفاءلوا بالخير تجدوه

هو الحق يتقال الستات بقى خلقها ضيق حبتين.. يعنى شفت فيديو  المذيعة بتسأل واحدة إنتى قتلتيه ليه؟ قالت لها أبدًا جريمة قتل عادية جدا.. مش فاهمة عادية إزاى؟ يعنى عمل لك إيه؟ عملتى فيه كده ليه؟ الرد الوحيد اللى فيه شوية منطق يدعو للتفكير أما قالت لها ما أنا لو ما قتلتوش كان حيقتلنى.

فيه مشكلة حقيقية فى المجتمع.. وفى العالم كله أظن  زادت بعد الكورونا.. حالة اكتئاب عامة على غضب عام على حالة زهق وملل.. لو سألت أى حد الأيام دى أخبارك إيه؟ حيقول لك زهقان مخنوق.. إلخ.. إلخ.. إلخ.

مبدئيا لا رجالة ولا ستات عايزين يدخلوا السجن أو حبل المشنقة.

مش انحياز للستات والله بس تكوين الست إنها أم بالفطرة حتى لو ما خلفتش أو ما اتجوزتش.. وأم يعنى حنية وعطاء.. الست ما بتوصلش  لمرحلة العنف غير بعد سلسلة من القهر المستمر.. على فكرة والراجل كمان أكيد بس موضوعنا النهارده الست..يعنى الراجل ممكن يضرب فى خناقة فى الشارع ويرجع فرحان إنه أخد حقه.. الست بتبعد لو شافت خناقة لأحسن حد يلمسها بالغلط.

مش حقول إن الستات ملايكة.. إطلاقا..فيه قرشانات (مش عارفة هى بتتكتب بالألف واللا بالقاف) وفيه ستات كيادة وفيه بتاعة مصلحتها وفيه ستات مادية وقوية ومفترية.. بس الأكيد أن العنف مش من الصفات الأساسية عند الست.. الستات بطبعها حنينة.

يضحك عليها بكلمتين.. بس الضغط الممارس عليها مجتمعيا بقى كتير أوى.. الجواز والخلفة ومع الظروف الاقتصادية الصعبة كمان مطلوب منها تساهم فى مصروف البيت مع أن الشرع بيقول إن ذمتها المالية مستقلة.

والرجال من ناحية تانية بقى عندهم  إحساس كدة بأنهم فى النص مش عارفين  حقوقهم ولا واجباتهم وفيه حالة استسهال عند الطرفين.. الراجل والست مضغوطين.. والطلاق  بقى سهل جدا.. المهم ما تبدأيش حياتك وانتى بتفكرى فى القتل والطلاق.. تفاءلى وحافظى على حبك وحبه.. واعملوا مجهود دائمًا للحب  دا.. وربنا يبعد عنكم السكاكين والمسدسات.. ويملا بيوتكم ورد وشوكولاتات.

والقرار قرارك.