فطارك عندنا
أمولة.. أحلى سفرة لايف على الإنستجرام
إعداد: نهى العليمى
ارتبط رمضان لدينا بكل ما لذ وطاب من المحمر المشمر !!
قرّرنا فى صباح الخير أن نقدم أطباقًا مميزة لسفرة رمضان ونوازن بين طرفى المعادلة، بين الطعام الشهى المميز لهذا الشهر الفضيل، والصحى الخفيف الذى أصبح توجُّهًا عامًا أملًا فى صحة أفضل..ليكون «فطارك عندنا» عزيزى القارئ بقائمة إفطار مميزة ليست لشيف عادى، شعارها «صحى ولذيذ».
الأسبوع الرابع
هذا الأسبوع نستكمل وصفات الشيف أمل عويس الشهيرة بأمولة، التى تشترك فى إعدادها «لايف» مع متابعيها على الإنستجرام الذين تخطوا الستين ألفًا لما تملكه من كاريزما وطاقة إيجابية وظهورها مع أولادها وأحفادها وأصدقائها.
وتقول أمل: «أولادى وأحفادى يعشقون أكلى وشجعونى وفخورون بما أقدمه.. وعندما تزوجت كنت 18 سنة لا أعرف سلق بيضة علمتنى والدتى وحبيت المطبخ وأصبحت بعد 35 سنة زواجًا أدرس فى أكاديمية فن الطهى وهى معتمدة من إنجلترا ودائمًا أنصح من حولى: «احلم وحقق حلمك ولا تجعل السن مانعًا لتحقيقه».
سلطة المكرونة أحلى سلطة:
المقادير
300 جرام مكرونة ملونة أو عادية
خضار كله قطع صغيرة جدا
2 فلفلة من كل لون
3 جزرات
حزمة كسبرة خضراء
1/2 حزمة شبت —كوب صغير حمص شام مسلوق
2 بصلة خضراء أو بصلة عادية
حزمة بقدونس
الصوص
عصير 4 ليمونات
5 فص توم مفروم
معلقتين خل
معلقتين زيت زيتون
معلقتين صويا صوص
معلقة كبيرة عسل أسود
معلقة صغيرة كمون
ملح وفلفل
الطريقة:
تسلق المكرونة مع الماء المغلى وملح خمس دقايق
تشطف بماء بارد وتترك لتبرد
نقطع كل الخضار والبصل والخضرا
نخلط الصوص مع التوم
نحط المكرونة فى طبق كبير
ننزل عليه بالخضار والخضرا وحمص الشام ننزل عليهم بالصوص تقلبهم مع بعض ونقدمهم.
أطباق رئيسية ولا أحلى:
1 -عرق التربيانكو
- المكونات
عرق تربيانكو
150 جرام زبدة
4 معالق زيت زيتون أو عباد الشمس
4 فصوص توم
ملح وفلفل
رشة جوزة الطيب
3 ورقات من اللاورا
4 فصوص حبهان
4 فصوص مستكة
2 حبة جزر
2 حبة بطاطس
1 بصلة
3 حبات فلفل رومى وأحمر
- الطريقة
العرق لازم يكون ملفوف كويس جدا
نتبل العرق بالملح والفل وجوزة الطيب
ننزل به على الزيت والزبدة فى طاسة ساخنة فيها المستكة والحبهان وورق اللاورا
نحمره كويس جدا على كل الاتجاهات
ننزل حولها بالبصل والتوم ونقلب ننزل عليهم بالخضار كله ونقلب لحد ما نحس إنه ابتدى يتشوى
نبدأ ننزل عليه بكوب كبير ماء مغلى
نغطيه كويس جدا بورق زبدة مدهون بالزبدة وفوقه ورق ألومنيوم
يدخل الفرن الساخن من قبل على 180 درجة ويقلب على الوجه الآخر بعد 45 دقيقة ولو احتاج ماء نزوده على أن يكون الماء مغليًا
بعد ما يستوى نتركه حتى يبرد تمامًا
يقطع حلقات ويقدم مع الصوص.
الصوص:
كل الخضار والبصل والتوم اللى كانوا مع العرق نضربهم فى الخلاط ويصفوا بيقدم مع الرز الأبيض والسلطة.
بطاطس بالديمى جلاس
البطاطس ممكن نعملها كذا يوم وبطرق مختلفة مقلية ويوم مشوية ويوم مسلوقة ويوم مع المقلوبة ويوم صينية ويوم مهروسة ويوم عجة ونضربها فى الكبة.
النهارده بقى عملتها بالديمى جلاس بأسهل طريقة وهاتكون أحلى. سلقت كيلو بطاطس بقشرها فى ماء بارد بعد ما غسلتها كويس جدًا.
حطيتها مع ماء بارد وورق لاورا وملح وفلفل أسود وبهارات بطاطس
وبعد 25 دقيقة استوت قشرتها
قطعتها مكعبات
وحطيتها فى طاجن فرن
عملتها صوص بالديمى جلاس بيكون معمول جاهز فى كيس فى السوبرماركت أخدت معلقتين كبار مليانين على 2 كوب ماء بارد قلبتهم كويس جدا ولما اندمجوا حطيتهم عالنار ونص معلقة توم مفروم وملح وفلفل وبهارات بطاطس
ومعلقة زبدة صغيرة ومعلقة بودرة مرقة خضروات ولما غليوا وابتدوا يغلوا نزلتهم على البطاطس.
دخلتها الفرن 20 دقيقة
وطلعت خطيرة وحطيت عليها كسبرة خضرا.
حلو وخفيف:
- ميلفووى بالكريمة والفراولة
رقائق بافبيسترى جاهزة
علبة كريمة بيسترى
كوب لبن (ممكن خالى الدسم)
معلقتين كبار لبن مكثف
نص معلقة ڤانيليا سايلة
سكر بودرة للوجه
فراولة
الطريقة:
نولع الفرن
نرص الرقائق على ورق زبدة
يدخل الفرن لحد ما يحمر من تحت
نقلبه على الوش التانى ونسيبه لحد ما يحمر
فى طبق غويط ندمج علبة كريمة البيسترى مع اللبن والڤانيليا ونقلبهم كويس أوى
نسيب الرقائق والكريمة يهدوا تمامًا
فى طبق تقديم نرص راق فوقه كريمة وهكذا ونرص الفراولة.
ننزل عليهم برشة سكر بودرة وألف هنا.