الجمعة 29 مارس 2024
رئيس مجلس الإدارة
هبة صادق
رئيس التحرير
وليد طوغان

رحلة

ريشة: أحمد كرم
ريشة: أحمد كرم

يا دنية الحلم اللى لسة مستجد



مش أى حد هيدق بابى..

هدخّله

آخر كلام وكلامى جد

مش هرضى جرح جديد

ومش هستحمله

مش هرتجى م الشمس ضى

أكتر من اللى بتبعته

مش هتقتل وأنا لسة حى

ولا حتى حلمى هحدده

هنسى الدموع

وإن جتنى صدفة هردها

مش هابنى زنزانة حنين

وأرمى السنين فى حضنها

أيامى مش هتكون نُسَخ

من بعضها

يمكن صحيح أنا مش جسور

لكن هثور

وهاخلى قلب الليل..

نهار

قلبى خلاص رفض الطابور

بصراحة مل الانتظار

دق الجرس

«وعلى المسافر التوجه للقطار»

أيوه هاغيب

وهسيب زمان الممكنات

حبة حكاوى مبعترة

وقلبى اللى مات

مش هحضنك..

ما تدمعيش

مش هرضى تانى بكونى أحسن..

من مفيش

وأكيد هعيش

لو حتى رافضة الأمكنة

تشهد عليا شفايفك المتلونة

ما لمستهمش

ما انا كنت خام

ما اعرفش غير إن الشفايف..

للكلام

كلام وبس

ما اعرفش غير إن الهوى

قلب اتلمس

وما كنتش أعرف

إنك وافقتى

لاجل ما أبقالك ونس

دق الجرس

«آخر نداء على رحلة القطر اللى طاير للنهار»

يا سكتى

طولى ومرى بالسنين

ما يهمنيش هوصل لفين

مش هسألك

عابر سبيل ماشى فى طلعة محملك

لِفّى البلاد

واختارى أى مكان بعيد

وما تقلقيش

هعزف مع اللحن الجديد

وهتوِّنه

كل البشر سهل إنهم يتلونوا

لكن يا ريت

أوركسترا الزمن اللى جاى

ما يكونش فيه..

قانون وناى

لاحسن أتوه

وأحنّ للحن القديم